محمد بودرا صمت دهرا و نطق كفرا

نيشان/ مبارك بدري

السي محمد بودرا راجل طيب ولا شك… لكن الطيبوبة في بعض الحالات تدفع صاحبها إلى السقوط في مطبات لا معنى لها… هادي حال السي بودرا هذا اليوم… خرج دار تدوينة تايتهم فيها المحامي عبد اللطيف وهبي بأنه قال له في يوم من الأيام أنه “سيقضي على التيار الريفي بالبام” ….

و مطلوب منا حنا “القطيع” المسكين ديال المناضلين الباميين أننا نتيقو هاد لكلام…. لكن حنا غادي نحلله و نطرحو أسئلة، و إلى كان كلام منطقي مرحبا … ولكن ها نتما غادي تشوفو باللي كلام بودرا ماشي هضرة معقولة….

الملاحظات:

1) هاد لكلام يلا كان تقال، راه كلام خطير أ صاحبي … وكان خاصك ما تسكتش عليه في النهار الأول… وترفع تقرير “بوجود عقلية عنصرية” عند وهبي …و تطالب لجنة التحكيم والأخلاقيات أنها تتدخل…. و تبت في هاد الهضرة…. لكن السؤال علاش ما قلتلينا والو أ السي بودرا؟ و علاش حتى لدابا الي قريب يسالي الفيلم ديال صاحبك “صاحب سيمون بوليفار” عاد هضرتي؟

أنا عارفك علاش درتي هاد الخرجة….. كن عندك الشجاعة ا السي بودرا و قول لنا شكون “هذاك” اللي اتصل بيك وقالك دوي… و عتق “وينخ”..؟

و قبل من داكشي، تنذكرك أن هذاك اللي اتصل بيك، هو أول واحد حاربك و حاصرك و همشك، لأنك ريفي مثقف ماشي بياع شراي ديال داكشي اللي على بالك….

السي محمد أنت أكبر من هادشي…

2) كونك تاتقول هاد الهضرة على وهبي … راك بحال داك اللي كاينفخ في الرماد… لأن وهبي سوسي… و يمكن اللي بقى ليكم في هاد البام هو اللعب على وتيرة القبلية… وهادشي خطييييير …راكم تاتخربقو ا صاحبي….. ماشي سياسة هادي…. واحد عاد تفكر “التيار المصلحي” و بدا يشير اتهامات…. وانت غادي يدخلو بيك للعنصرية…. واش هادشي لاش بنينا البام…باش نشعلو العوافي؟؟؟؟

من جهة أخرى، هضرتك اعتراف منك بأن وهبي زعما هو قايد الفريق الاخر… و هذا انت عارف بأنه ماشي صحيح…. وهبي عنصر عادي و صعيب يسوق حتى راسو….

3) مسألة أخرى… كيفاش وهبي “يقضي على تيار ريافة” و هو شاد بيديه و سنانو في الحموتي؟

ولا ياكما حتى الحموتي غادي تقولونا لينا بأنه بغى يقضي على التيار الريفي ؟

ياكما الحموتي ولا فاسي و لا رباطي و ما فراسناش؟

السي بودرة … راه حنا كنا تانعتبروك أمل… و حل ثالث مقبول…. برزانتك و عقلك … ما تخليش “الأميين” يفتيو عليك شنو تدير…. زيير راسك معانا…. أ دكتور….

وباش نسالي الهضرة…. غادي نذكرك بكلام قالو ليك وهبي نهار مشى إلياس و ما بغيتيش تقولو دابا… وهو الكلام الصحيح… أنا غادي نقولو ليك وكذبني إلى قدرتي….

تعقل نهار قال وهبي في واحد العشاء “خاصنا أمين عام ريفي…. لأن الظرف لا يحتمل شي واحد يدير شي قراءة عوجة للاستقالة ديال إلياس…”؟؟

السيد داك الساعة كان تايدافع على أن البام يبقى على راسو واحد من الريف…. و بزاف من صحابو دابا تقلقو منو …و قالو ليه لاش هاد الاعتبار العنصري القبلي …البام ديال المغاربة كاملين….

وتجي دابا تزلق هاد الزلقة و تخرج لينا بآخر السيناريوهات باش تنقد صاحبك وصاحب بوليفار….؟؟؟

راكم عييتو ….وبديتو تاتدخلو و تخرجو في لكلام….. و غادي تقتلو الحزب …. الله ياخذ فيكم الحق…

تدوينة محمد بودرا على الفيسبوك

قد يعجبك ايضا

اترك رد

لن يتم نشر عنوان بريدك الإلكتروني.