شكون كان يتوقع أنه ثقافة تقدس الانجاب و مليئة بزخم من الأمثلة الشعبية بحال “دري كيتزاد برزقو”، و الطقوس و عادات كتبدا من نهار البنت كتبلغ مرورا بنهار عرسها حرصا على ضمان خصوبتها العالية هذا غير أنواع من الأطباق و الأعشاب التي تقدم للمرأة المغربية سعيا لأن تكون أمرأة ولود، وسط هاد الثقافة المثقلة بفكرة الخصوبة و الانجاب غايخرجلينا جيل يقول لا للإنجاب!!
شنو هي اللاإنجابية؟
اللاانجابية Antinatalism هي توجه فلسفي كيعتبر الانجاب فعل لاأخلاقي و أنه جريمة فحق الإنسانية، و السبب الي كيقدموه دعاة هاد النوع من الفلسفة هو أن قرار الانجاب يتم دون إرادة داك الطفل لي مزال أصلا ماجاش للحياة، يعني أنك منين كتقرر تجيب طفل للحياة فأنت كتفرض عليه أنه يخرج للوجود دون إمكانية أنه يكون مخير فهاد القرار، و بما أنه يستحيل ذلك فأفضل شيء هو ما تجيبوش لهاد الحياة، علاش هادشي كامل حيت بالنسبة ليهم الحياة فيها المعاناة و الألم و الشر لي يخلي أي انسان يفضل لو أنه ما تولدش فيها.
الشباب المغاربة هل يتهرب من المسؤولية، أم يتبنى فلسفة أخلاقية؟
انتشرت فسينين الأخيرة مجموعات فيسبوكية كبيرة بحال “Moroccan Antinatalist” فيها تجمع لمختلف الشباب المغاربة لي ختارو اللاانجابية، لعدة أسباب منها أن الوضع فالمغرب غير مشجع على تكوين أسرة، بسبب ارتفاع نسبة البطالة و تدهور القطاع الصحي و التعليمي كيقتل أي أمل لمستقبل أفضل للأجيال القادمة، لكن هادشي ما كيمنعش أن هاد شباب كيعتارفو بعبء الانجاب، خاصة أنهم كيشوفو أن المجهود لي كيحتاجو الفرد باش يهز مسؤوليته الذاتية كافي باش يخلي أي واحد ما يفكرش يزيد مسؤوليات أخرى. و صرف النظر عن الأسباب الحقيقية و باختلافها، فكيبقى سؤال كبير أكبر من أي توجه هو:
فين مشات الغريزة؟
صعيب نصدقو أن الانسان ممكن يتبنى أيديولوجيا أو فلسفة تساهم في انقراضه، و طبعا هاد الأمر مستحيل مدام الطبيعة تدفع كل يوم الانسان للتكاثر، عليها بزاف دناس لا يأخدون دعاة هاد الفلسفة بمحمل الجد، و الكثير منهم كيتحداوهم أنهم يقدروا يقاوموا الرغبة فالأمومة و الأبوة، لكن اللاتناسليين كيشوفو أن إدراك الانسان و وعيه يقدر يوصل لمرحلة يتجاوز فيها رغبته في استمرارية جيناته، و أن هدفهم الانساني في التقليص من المعاناة البشرية بالامتناع عن جلب المزيد من الأطفال لهاد العالم البائس، هو هدف أكبر و أهم من أنهم يسمعو كلمة [بابا] أو [ماما]، و لكن واش هاد الشباب قادر أنه يلتزم بما يعتبر مبدأ انساني خاصة فمجتمع كيضغط عليك تولد و تخلي الخلف، هادشي ما يمكنش نعرفوه إلا عن طريق احصائيات نعرفو من خلالها اعمار اللاانجابيين، و واش النساء مقبلات بكثرة على تبني اللاتناسل؟ أم أنها مجرد موضة فكرية ستتلاشى مع تقدم العمر.
