Rik and Morty مسلسل الكرتون الأمريكي المستوحى من علاقة مارتي و دكتور براون من فيلم الخيال العلمي الشهير back to the future.
و اللي عبارة عن حلقات منفصلة عن مغامرات الجد ريك برفقة حفيده مورتي عبر مجموعة من الأكوان المتعددة و العوالم الموازية، و كل حلقات وظفت فيها أعظم المسلسلات و الأفلام بشكل ذكي، رسما و كتابتا و حوارا.
- ريك رجل نيتشه المتعالي
لا أعتقد أن هناك شخصية أنمي حضات بهاد الشعبية و الحب لدرجة التعصب ليها بحال الجد ريك، عالم قد يكون أذكى شخص في الكون لكن في نفس الوقت غارق فالعدمية و الملل و الإدمان، ريك العالم السكير هاد الثنائية لي تعتبر جوج صفات متضادة ممكن تعطينا صورة كافية لرؤية ريك للعالم.
الوعي و اللاوعي، درجة من الإدراك العظيم لما هو عليه عالمنا، و لي وصليها عقل ريك، خلاتو يختار يعيش فحالة عكسية حالة السكر و إدمان الكحول، لعنة الوعي لي كتخلي هاد الإنسان الكائن الفضولي الذي يسعى باستمرار للإجابة عن أسئلته، هاد الإنسان نفسه منين كيعيق بالورطة لي حطو عقلو فيها، كيفضل يتعايش مع لعنة إدراكه باللامبالاة و يخفف من حدة وعيه بالخمر.
>>لا أحد ينتمي إلى أي مكان، و كلنا سنموت في النهاية. تعالي نشاهد التلفاز<<
أعتقد أن أنمي ريك و مورتي هو سلسلة من النظريات الفلسفية لي تقدمات سواء رسما أو كتابة بكم من الإبداع لي خيالي، تراجيدية مسلية و كوميديا سوداء، كتجلسك فكرسي لفوق و تقولك يلاه تفرج على الكون، شاهد عبثيته، كم هو غارق فلامعنى!!
مأساوية الوجود كانت أعمق و أجمل ما جسد في السلسلة، كيفاش قادر تخلي شيء غارق فالمأساوية يبان ممتع و ساخر للمشاهد، عن طريق أنك تخلي المشاهد يلعب دور “المتفرج” على عوالم أخرى، هاد العوالم تاهي فيها حيوات و قصص، كائنات بأشكال غريبة كتعيش ضمن سيناريو شديد الغرابة، لكنه بالنسبة ليهوم هو طبيعي و بالنسبة لينا حنا لي كنتفرجو من برا هو عالم عبثي و ماعندو تامعنى.
نفس الأمر بالنسبة لعالمنا، و هادشي لي كتوضحو لينا السلسلة، أن حياتنا تاهي غارقة فالعبثية و اللامعنى، و حنا ما عايقينش بهاد المأساة الوجودية، غي حيت عندنا دورة حياة روتينية تتكرر مع الجميع. فكنتخيلو أنه هناك نظام و أنه كاينة شي حاجة مورا هادشي كامل..
“مورتي“ نسختنا ما قبل الوعي
كان ديما واحد سؤال يتبادر إلى ذهني أثناء مشاهدة السلسلة و الي هو: علاش اختيار علاقة الجد بالحفيد بالضبط؟
كان ممكن الاكتفاء بشخصية ريك، لكن يبدو أن مورتي كان لابد ما يكون باش نفهمو ريك، لأنه كيفاش غاتفهم عجوز عدمي سكير لامكترث بدون ما تكون هناك شخصية نقيضة ليه سواء على مستوى العمر أو الذكاء.
مورتي المراهق لي كل همه أنه يلفت انتباه زميلته جيسيكا، كيلقى راسو فوضع أكبر من ذكائه و إدراكه، مورتي هو نحن، بسعينا طفولي أننا نحققو شي حاجة فهاد الحياة، بنوايانا البريئة اتجاه ما قد تكون عليه الحياة، و رؤيتنا الحالمة حول حقيقة وجودنا.
حنا هما مورتي قبل أن تصيبنا لعنة الوعي، لذلك يمكننا أن نعتبر أن شخصية مورتي أكثر إيلاما من شخصية ريك، حيت كنعايشو رحلة الانتقال من مراهق محدود الذكاء، إلى لا مكترث يعي وجود حقيقة واحدة هي أننا كلنا سنموت، و فحلقة بحال حلقة “مورتي الشرير” و لي غاتقدم فيها أعظم موسيقى تصويرية فنظري بينما إحدى نسخ مورتي كتسبح فالفضاء المظلم في إشارة إلى حقيقة أنه لا مهرب من مأزق الوجود..
